星期五, 10月 16, 2009

lady First 專欄(62)- 愛情感覺

如果要你去形容愛情嘅面貌,解釋愛情,你會點講呢?

有人話愛情係天長地久嘅,係細水長流嘅,王子同公主從此以後幸福快樂咁生活落去就係愛情。

亦都有人話愛情係不顧後果嘅,係死去活來嘅,要流好多好多眼淚,先可以成就一段愛情。

總之,問一萬個人,可能會出咗九千五百個唔同嘅答案。

不過,最多人話嘅一定係 —— 愛情係浪漫嘅。

到底,有幾多人真係經歷過浪漫嘅愛情,定係俾人洗咗腦,認定愛情係非浪漫不可?

雖然結局可能好醜陋,起碼開始同過程,係漫天星花咁浪漫嘅,只可惜埋門一腳撻Q… … 咁就夠老咗嗰陣懷緬過去。

我讀書嘅年代,好多同學仔都鐘意睇嚴沁,岑凱倫同瓊瑤嘅愛情小說(哎呀好老餅呀),尚未戀愛過嘅小小心靈,就此被荼毒。

「有日放學時間學校門口突然有架黑色跑車停低(Maserati PLEASE),一個 6 呎高著住白恤衫 cargo pants 張震咁款嘅俊男跳落車,走埋嚟同我講佢已經等咗我一生一世。」—— 呢個就係我哋呢班無知少女將愛情嘅幻想。

過多咁多年,即使拍過拖十次八次,呢班無知少女,都已經成為中女,但係心裡面嘅愛情,依然係咁不切實際。

愛情好似漸漸變咗一樣賣感覺多於真實生活嘅嘢,同時又將呢種感覺變成商品。

每逢星期六、日,就會見到有好多情侶喺宜家傢俬行街,你認為當中有幾多對係準備結婚,或者真係同居緊呢?

1 則留言:

  1. Happiness - Happiness is a word for a feeling. Feelings are rarely understood; in a moment they are quickly forgotten and misremembered ;)

    回覆刪除