星期三, 7月 27, 2005

憎死你

憎死你憎死你憎死你~~~

我都話憎死天水圍架啦塊地凹凸不平十九幾個窿百九幾條坑千九幾塊磚都爛既,

我對對靚鞋都死o係你呢塊爛地度。

你好野呀~~~ 又整爛我對Kate Spade!!!

我d high heels o係中環銅鑼灣金鐘尖沙咀行足一日街跳足一晚舞都冇事,

一返到天水圍就死無全屍。

到底你明唔明白本小姐已經今非昔比好多年架啦,

你估仲係以前咁日日買起勢買好似唔駛錢咁買呀?!

你係咪要我著旺中69蚊一對既high heels先安樂呀?

你係咪要我行入連卡佛頭耷耷急步直線向前行先心涼呀?

你係咪要我挽住對high heels赤腳行到去西鐵站先著鞋呀?

你知唔知我望住對鞋真係心痛到想喊架?

星期二, 7月 26, 2005

蘇眉語錄3

K:「blah blah blah... .... ....」

E:「我呢排真係好繁忙ar ma~~~」(懶係做緊公司野好忙既聲)

K:「你係只有私務,沒有公務。」

E:「Umm... ...」(一片死寂)

Mr. P

毫無原因地,我想寫下關於Mr. P的一點東西。

或許,是有原因的吧。

因為我用了一句:"It is the time you have wasted for your rose that makes your rose so important."

而Mr. P回答我:"i know that is from the little prince.. right?"

我沒有愛上Mr. P,但確曾對他有過憧憬。

不過,最後只做了朋友。

Mr. P是我喜歡的類型。

較我大十年、不喜炫耀、厚實的肩膀、需要也會給予別人空間。

他有讓我安心的氣質,遠遠看見他,我便會笑。

他跟很多人一樣,喜歡賺錢,喜歡有金錢回報的事物。

不同的是,他的一顆心尚未蒙塵。

除了在錢眼內打轉,他也會感到寂寞,會細緻地感受這個紛亂的世界。

至今我仍有懷疑,我們不能走在一起,真的因為我年紀太小?

那一夜,他說過,畢業後的第一份工作,是教書。

他說難以想像,當年他教過的,那些吱吱喳喳缺了半邊腦袋的中二、三女生,今天坐在他身旁,和他一起看三級片,說心事,替他搥背。

他說難以接受。

真正的原因我已不想深究,反正今天剩下的,只有友情。

星期一, 7月 25, 2005

好好玩

1. 今日起身第一句講咩:無論發生d咩事,我都要記住我已經係一個好幸福既人。宜家呢一切只係o岩o岩開始,唔好咁悲觀諗得太多,亦唔好開心得太早,keep住平常心啦。(每日起身都同自己咁講)
2. 你老豆姓咩:我跟我老豆姓,佢姓咩我姓咩。
3. 你亞媽姓咩:嘩... 佢唔想我講出o黎
4. 鍾意亞媽多D定亞爸多D:亞媽,因為亞媽好駛好用多d。
5. 亞爸煩D定亞媽煩D:亞媽
6. 你覺得今日自己有冇靚左:我覺得自己有愛情滋潤時會靚d
7. 你覺得自己細個靚d定大個靚D:細個時幾可愛,青春期好似TB,大個左成隻妖精。
8. 慣左幾多點訓:凌晨2點
9. 黑眼圈大嗎:從來冇眼袋,一個禮拜以上唔夠訓就會有少少黑眼圈。
10. 你會點應付D突如其來既暗瘡:Retin A + 特麗仙暗瘡水 + tea tree oil + kiehl’s藍水 + 清肌晶面膜。
11. 你想有幾高:高多4吋啦,宜家成個矮冬瓜。
12. 玩電腦個陣隻腳放係邊:隨心ga bor
13. 見到朋友有鼻屎會唔會出聲:會~~~ 做人唔能夠見死不救。
14. 會唔會剃毛:會,我仲會用眉拑拑佢出黎。
15. 係好逼既地鐵裡面有個勁臭既人對住你,你會點:速逃
16. 見到賣旗既人會點:如果係東華三院我死都唔買
17. 自已係報串個d人定係被報串個D人:俾人報串篤到背脊爛晒o個隻
18. 對COSPLAY人既感覺:我情願著住套bikini遊街示眾
19. 如果得一千蚊會買好多平野定一件貴野:Well… …不如買樣野送俾自己鍾意既人。
20. 鍾意啟德多D定赤臘角多D:赤臘角
21. 有冇諗住減肥:有,但係跟住又走去大魚大肉。
22. 夏天鍾唔鍾意著白TEE:我prefer白色連身裙
23. 如見到有濃密格勒底毛既男人向你靠近,你會點:見題15
24. 鍾意筲箕灣多d定柴灣多D:No comment
25. 最憎D咩人:傷害我既人
26. 有冇成日係廁所對住塊鏡自己同自己講野:有,每朝既例行公事。
27. 係咪好易鍾意人:唔係,而且鍾意左一個人,就會鍾意好耐。
28. 係咪成日以為人地鍾意你:唔係,我係o個種人地兜口兜面同我講鍾意我先至會知道既人。
29. 係條街度係咪成日望住D靚既異性:同性都望
30. 承上題,如果有男朋友係隔離,會唔會照望:有好野,梗係齊齊望。     
31. 係咪成日當左自己係明星既伴侶:唔明呢題講咩
32. 考試鍾意個日前先溫書定好耐之前溫,定係唔溫:o個日前,或者幾個鐘頭前。
33. 如果有摩門教既長老同你講野你會點:我會同佢講我信「訓覺」
34. 鍾意朝早多D定夜晚多D:I’m a night ghost
35. 係巴士度鍾意坐上層定下層:上層
36. 承上題,鍾意坐前面定後面:中間
37. 大個想做咩:賢妻良母賢妻良母賢妻良母
38. 諗住幾多歲結婚:16歲,但係我開始覺得我起碼到30歲先嫁得出。
39. 屋企地板係木,磚定地毯:磚
40. 如果比你時光倒流,你想番去邊/幾時:中五o個年
41. 電腦HANG機你會講咩:講粗口lor
42. 覺得女仔最緊要係邊度靚:樣靚身材正。我唔多信呢個世界上有男人鍾意一個女仔係因為佢心地善良。
43. 覺得男仔最緊要係咩:有上進心
44. 一望會望女仔邊度:樣,and then胸。
45. 有冇試過打巴人:有,不過通常係打巴自己。
46. MSN唔識佔識人既比率係:我唔識計
47. 會同看更講早晨:日日都講,仲要講三次。
48. 係咪寧願凍都唔著多件衫:「我只想身體健康我害怕你要照顧我擔心得出一臉倦容……」手裡面永遠都有pashmina。
49. 暑假鍾唔鍾意留係屋企HEA:鍾意,所以成日一到暑假就轉工抖暑。
50. 暑假時你d fd死晒去邊:返工同拍拖,賴低我一個。
51. 鍾意自己約人定係人地約你:梗係人地約
52. 有冇細佬妹?冇
53. 易唔易心軟:好易,所以我好鍾意食小南國既心太軟。
54. 覺得IVE好D定副學士好D:hmm… … 我讀HD ga bor。
55. 最鍾意聽咩電台節目:絕情谷,remind自己唔好做o個d會俾人退貨既癡男怨女。
56. 有冇試過自己係條街度笑:點止~~~ 仲會唱歌tim。
57. 如果有人打黎做問卷調查你會點:唔好意思呀我唔得閒幾時都唔得閒byebye。
58. 試過玩電話未:未
59. 情人節會唔會走去買朱古力勁派比人:o下?我等收ga ja bor。
60. 如果見到自己既男友同異性攬,你會點:我會對佢微笑,然後拎轉身走開跟住喊。
61. 有冇試過自毀?如有,點解?著high heels係一種慢性自毀,but I like it。
62. 成日著鮮色衫定沉色衫:五顏六色
63. 開學同依家個樣有冇分別:我冇得開學幾年啦
64. 剪完頭髮後係咪成日覺得自己好樣衰:係好靚,跟住即刻去dating。
65. 比人洗頭人地問你邊度痕,你會答:唔痕,唔該唔好洗到我堂眉。
66. 比人搵粗口鬧你你會:會令佢明白用粗口鬧女人既下場係一條死路同死路一條。
67. 同朋友鬧交,邊個會講對唔住先:我有錯就我講對唔住先
68. 自己係咪一個火爆既人:火爆係唔足夠黎形容我有幾恐怖
69. 大個想唔想搬出去住?如想,會唔會同朋友住:想,朋友同男友都得。不過可唔可以分房?
70. 除夕會係邊度倒數:冇所謂,只係想同愛人一齊渡過o個一刻。
71. 最鍾意去香港邊個沙灘:諗唔到
72. 去CAMP鍾意去幾耐:一秒都唔鍾意,但係會同一班朋友去酒店當去camp。
73. 返學搭咩車:輕鐵、「11號」、巴士。
74. 最唔鍾意學校旅行D咩:成個過程都好無聊
75. 想幾多歲退休:26歲 (發下夢好啦!)
76. 你有冇自我:有,我唔會再容許自己冇左自我。
77. 有冇比人過話你似一個人:有,章小蕙。 (Patrick Siu其實我聽到你咁講o個一刻我真係幾想死)
78. 重有冇同小學同學聯絡:一千零兩個
79. 會唔會特登唔聽人電話:一定會
80. 有冇假想敵:冇
81. 幾耐冇影貼紙相:耐到唔幾得有幾耐
82. 頂唔頂得住影相谷塊面出黎個人:唔明
83. SPORT DAY會唔會嗌口號:我讀女校叫黎把鬼咩
84. 見到姣到出晒面個D姣婆會點:等於見到自己
85. 見到懶型留晒鬚既後生仔會點:哦
86. 駛唔駛一定要冇晒肉先覺得瘦:有少少肉好
87. 小學讀邊間:XX商會學校
88. 有冇做過PART TIME:做過幼稚園tutor做過小學tutor做過補習做過sales做過秘書仔做過茶館waitress
89. 做到呢度,有冇想死既感覺:開始覺悶
90. 你係咪一個易喊既人:唔係,只會o係好感動同好傷心既時候喊。
91. 你係咪一個喜怒不形於色既人:七情上面
92. 你同你公公婆婆熟唔熟:公公會幫我買化妝品婆婆會借錢俾我交學費你話熟唔熟呀?
93. 試過搭巴士唔比錢未:試過
94. 依家中秋節重有冇玩燈籠呀:冇,今年想要隻老土白兔紙燈籠。
95. 生日重想唔想開生日會:想~~~ 我既口號係:「25歲,搞大佢。」
96. 細個會唔會LUR地:打得少咩,從來唔敢lur。
97. 搬左幾次屋:3次,大窩口→屯門→天水圍。
98. 你係邊個:唔係呀化?做左大拿拿97題你都仲未知我係邊個?!

星期四, 7月 21, 2005

緊急通知

致各方友好:

由於Final Sale氣氛籠罩,本人銀行戶口存款牛皮偏軟,月頭高開後反覆上落,存款於1400元水平附近徘徊。

本人八月份必須繳付之非經常性咭數已達5000元,隨時上試6000元水位。另加經常性咭數及上繳中央的鄭氏家用,八月份薪金開市後將明顯受壓,估計將手上僅餘存款拋售,換取西鐵月票後,本人會身無分文。

因此,各界人士如無必要,請不要相邀本人出席任何飯局,如JW Marriott High Tea、Felix Happy Hour及IFC利苑晚飯等。

同時,Lane Crawford On Sale漸見熾熱,本人的集資活動轉趨活躍,預期集資額須達4000元,才有望將Joanna Ho high heels、hand made ballet shoes及Lu Lu handbag贖身。

Elaine

婦女新知

我係一個發育健全既女人 需要各種營養既平衡
男人 新衫 現金加約會 零食 珠寶 護膚品
運動 工作 交友再旅行 購物 娛樂 見男人
(少一樣都死)
Sorry Sorry 我係咪數左兩次「男人」
雖然係咁 愛情我都未算好著緊
(我緊架,不過急唔黎。)

今日我黎教大家整甜品
首先用滾水沖開Espresso粉
再擺D Lady Fingers落去 浸到「林」
另一方面 將d蛋白攪一陣
起泡就加dKalua再攪勻
(Bailey’s都得)
最後兩樣倒埋一齊整到一層層
恭喜你 咁就完成左個Tiramisu
一個世界馳名既意大利甜品
(最好食既Tiramisu,唔係Cova或者Sabatini,而係一個男人,親手整俾你食。可能外型同味道都好粗糙,但佢既情意係最重要既。)

你係一個發育健全既女人
所以呢個時候你有野想問
無端端 整甜品 係咪手痕
抑或教你兩招等你"乙水"情人
Sorry Sorry 各位等等
女人最好既野唔一定要同男人分
整個甜品 錫下自己當獎品
邊個話愛黎留住佢個心
(佢個心要變,你留都留唔住。不過,你同佢一齊既每一刻,都應該用心對佢,咁先自不枉愛過。)

有時返到屋企都覺得有d暈
因為買到成屋雜物無「訂」躉
(我唔買冇實際用途既野)
於是惟有出街Shopping 散散心
這就是我們購物狂的命運
(信我!我真係唔鍾意shopping。每次我都用9秒9既速度買野,然後即刻離開事發現場。)

你問我做乜買左六條一樣既裙
(冇奶油既,起碼個cut都唔同啦。)
你當我無用腦 其實我都有諗
漆皮真絲 橫紋直紋 長裙短裙迷你裙
綁帶拖鞋 平底高跟 唇膏胭脂乾濕粉
翻炒 再翻炒 係我地?既一生
(其實d款永遠都係咁上下)
只得舖頭永遠 有新到貨品

小學都有教 人類係一個社群
要相親相愛 咁先夠高等
既然平時唔准獨斷獨行 唯一呢個時候
我覺得唔駛靠人
唯一呢個時候 我可以全權負責任
唯一呢個時候 我真正憑良心
(買衫一定憑良心,冇女人會買著得佢唔靚既衫返黎。)

我係一個發育健全既女人
有乜傷心 自己識得做醫生
以前有事只係可以唸經文
而家仲有三個字:食、買、訓
買得多左最多忍一陣 
(Joanna Ho金色3吋high heels $1750→$1450 / 唔記得咩牌子ballet shoes $1450→$750 / Lu Lu Guinness藍色雀籠手袋 $3050→$1850,我幾時先有錢去連卡佛贖佢地返黎?)
食得多左去Gym 修下身
(好耐冇去啦,我想改打泰拳。)
只係擔心訓得太多有空虛感
(我唔多夠訓… …)
忽然好想身邊有個人
(我幾時都想有個愛人)

我吃 我戀上熱量 幸福又平常
誰又說 沒理想 我買 我擁有力量
讓心願能償 付賬單令我舒暢
(一d都唔舒暢,會好心痛。)

我係一個發育健全既女人 不過有時失驚無神發炆憎
以下呢句 你當我鬼拍後尾枕
我有時會諗 係咪真係要搵返個男人
(係呀係呀~~~)

寂寞的心俱樂部

「文筆小姐,人生真是悲哀,學堂出來,努力工作,轉瞬已經三十,我不是典型愛情小說讀者,也不屬傷春悲秋之人,可是期待中的愛情、幸運、快樂全無出現,日出日落,生活只似例行公事……」   

咦,岑諾芹想,這不是在說她嗎。   

「一日,喝完咖啡,借用洗手間,看到有一年輕男子匆匆自對面出來,他容貌英俊、身型高大,手裡拿著帆布旅行袋,酒店一名護衛員立刻上來驅逐他,我忽然明白,他是流浪人,借用衛生間梳洗更衣。」   

「剎那間,我見義勇為,一步踏上前,大聲說:『積克,大家在樓下等你 ── 甚麼事?這位是我的朋友,有甚麼誤會?請經理出來。』我一邊把名片遞過去,我在一間著名大機構內任高職。」  

「我替他解了圍。」   

「我們在酒店大門口分手,他向我道謝。」   

「三天之後,積克的電話來了,他目光尖銳,看到名片上的姓名電話,他想約會我,我應該怎麼辦?」  

諾芹搖頭,她把情緒沉殿下來,專心回覆讀者,「這種人不是你惹得起,速速更換電話號碼,冒險家樂園內縱有奇人奇事,決不適合良家婦女,請努力克服寂寞芳心,致力親情友情。」
___________________________________________

整個大世界,

就是一個寂寞的心俱樂部,

光怪陸離不過是尋常事。

誰人的心不寂寞?

活著的人還是要繼續活下去,

努力將寂寞時光熬過。

生活還是要繼續,

賬單還是要付清,

更要堅持愛人愛自己。

《男友一百戒條》其實是我對自己的一百個承諾,

我要修心養性,

我要乖,

我要珍惜愛情,

這樣才值得被愛。

星期三, 7月 20, 2005

男友一百戒條

1. 唔准同任何15歲以上35歲以下無血緣關係既女性單獨外出或者傾超過5分鐘電話。
2. 我‘meet’你既時候你唔准縮。
3. 我唔會check你既來電顯示,但係你最好唔好俾我聽到你同不明來歷既女人講電話。
4. 你個電話裡面只可以有兩個女人既相,你媽媽同我。
5. 唔好俾我見到你著白襪,除左打波既時候。
6. 我明白每個人都有過去,你會有舊情人既相呀信呀禮物呀,但係唔好o係我面前飄揚,有咩爛左唔好怪我。
7. 我鍾意收情信,但係好憎見到錯別字。
8. 每日起碼要打一次電話俾我,因為我會掛心你。
9. 你要俾我知你每日去左邊,我唔係要check你行蹤,只係如果新聞話有三名行山人士失蹤,我要知道係唔係你。
10. 我地未必可以一生一世,但希望你同我一齊既時候,每一刻都對我認真。
11. 我鍾意既手袋牌子係Lu Lu Guinness、Kate Spade、Anya Hindmarch、che che、agnes b同Tod’s,你千祈唔好買Patrick Cox同Westwood俾我。
12. 你心裡面諗d咩,一定要同我講,因為我好蠢,你唔同我直接講我唔會知道。
13. 我去dating你叫我玩得開心d既話,我會以為你唔愛我唔緊張我唔想要我。
14. 我鍾意男朋友買香水俾我。
15. 我希望你會記得一切既大時大節生日同紀念日,我唔會提,亦會扮大方,但唔代表我想你失憶。
16. 男子以才為貌,但係都要乾乾淨淨。
17. 唔好企圖或意圖用「中五妹妹仔o者……」黎做藉口安慰我,我唔會睇小妹妹仔既威力,因為我都曾經年青過。
18. 我慣性去i.t、Marie同Lane Crawford買鞋,鞋碼係Italy 36.5。如果你打算買鞋俾我,記得唔好買錯size。
19. 唔准對我講大話。
20. 唔准一腳踏兩船(或以上)。
21. 除非d食物好美味,否則我唔想去任何張椅冇椅背既餐廳。
22. 出街一定要拖實我,因為我會蕩失路。
23. 我唔揀飲擇食,所以食咩你話事(法國菜除外),不過,揀甜品既主導權歸我。
24. 如果我遲到,都只係因為我想著靚d見你,所以你唔好鬧我。
25. 你最好唔好有一堆女性朋友同契妹之類既不明物體o係身邊,否則我會大你三十萬用行動證明俾你睇我都有一籮男性朋友同契哥加uncle。
26. 我係一個會講粗口既淑女,你最好忍耐一下。
27. 食飯時第一箸夾既食物記得要係俾我既。
28. 我唔會要你幫我去麥當勞換公仔,但係會叫你幫我去Sogo、Joyce同Lane Crawford買化妝品。
29. 你唔好走去旺中買o個d所謂既純銀俾我,我會皮膚敏感。你有3個選擇:1. Tiffany 2. Georg Jensen 3. A Different Corner
30. 鑽石同珍珠,我永遠都唔會嫌多。
31. 我會想你同我一齊揀Lingerie,你唔需要面紅。
32. 我唔會問你我靚唔靚 (因為我知道我唔靚),你最好諗定第二樣o黎讚我。
33. 我鍾意食Cova既tiramisu、Zoe既zoe同1459,仲有Glace既Rose。
34. 我知道你冇可能每秒鐘都掛住我,但係如果你全日都冇諗起我,我會好驚。
35. 如果你著到成個板仔或者MK Guy咁樣同我出街,我會面青。
36. 如果你郁手打我,我一定會走。
37. 你要留意亦舒既新書幾時出,儘快買俾我。
38. 記得要多d同我既父母social,因為我同佢地關係唔好,靠你去修補。
39. Shopping時可以分道揚鑣,但係你唔好又要企我隔離又要黑面。
40. 我好樂意同你行你鍾意既舖頭,你唔需要怕我悶,我會自得其樂。
41. 行入7仔我只會買3種飲品:柑桔檸檬、參蜜同Perrier。
42. 唔好批評我既朋友,因為我同佢地共過患難,唔係酒肉朋友。
43. 我承認我係一個膚淺既人,我既日常讀物係《忽然一周》,你唔高興既我會隊本《紅樓夢》俾你睇。
44. 我唔介意你望靚女,介意既係有筍野睇你都唔同我講。
45. 如果你見到我望住本《飲食男女》兩眼發光,你可以留意下係邊間餐廳,唔太貴既就帶我去試下。
46. 我鍾意食魚蛋河,但係如果大時大節紀念日生日時都係食魚蛋河,我會發火。
47. 我喊既時候,你一定要‘乙水’我,因為我只會o係好傷心好傷心既時候先喊。
48. 你打機既時候,我會自己搵野做,你唔需要擔心,最好你教我打埋一份。
49. 你最好有一首只係屬於我既電話鈴聲。
50. 如果你冇開口講,我都為你去改變,代表我真心鍾意你,請你珍惜我。
51. 我好樂意幫你煮飯洗衫執屋做massage,但係請你唔好當「奉旨」。
52. 買野俾錢既時候,你記得要快我一步拎張credit card出黎,因為每個月俾完家用同找完經常性咭數之後,我既account只會得番$2000 cash。
53. 我會間唔時嗌「我好想嫁我好想嫁……」呢句係我既口頭禪,你唔需要太恐慌。
54. 你需要比我更清楚我既電話、DC同電腦既操作。
55. 當你睇波既時候,我會問你「咩係12碼」等低B問題,你唔好嫌我煩,因為我真係有興趣,但從來冇人教過我。
56. 我會希望你將我介紹俾你既朋友識。
57. 放假時我會間唔中留o係屋企休息,你即管出去玩,唔好以為我係貼身膏藥你唔同我出街我就唔出。
58. 因為我有一d唔係太開心既過去,對人好冇安全感。所以請你用用行動話俾我知你對我係認真既,你唔係玩玩下。
59. 你先要努力工作,然後盡量抽時間陪我。
60. 你唔需要係有錢仔,但係要有上進心,想出人頭地。
61. 你一定要有自己既理想。
62. 我唔會問你「我今日有咩唔同」,你唔需要每次見我都恐慌性將我由頭到腳scan一次。
63. 我想睇日出。
64. 我有寫blog既習慣,如果你發現o個篇係講你既,你最好俾d反應我。
65. 我知道我好刁蠻任性,我改緊架啦,唔好催我。
66. 你要做我既人肉地圖。
67. 我M之前一個星期會情緒暴躁,你要小心d。
68. 我發脾氣cut你線,你唔好即時又打電話俾我,send SMS得架啦。
69. 絕對唔可以check我既ICQ、MSN同SMS。
70. 如果你發我脾氣仲逼我上床,我會覺得好hurt。
71. 你煮飯俾我食,就算只係一碗餐蛋麵,我都會開心過食Rougie鵝肝。
72. 我同你講野既時候自不然會嗲聲嗲氣,我都冇辦法架。
73. 我好有興趣知你既戀愛史,最好由頭到尾同我講一次。
74. 因為愛你,我會珍惜自己,要自己身體健康,叫自己開開心心,你都係。
75. 如果有一日,我地分左手,我都希望可以繼續做朋友。
76. 我唔係唔想陪你著牛仔褲,而係未買到o岩我著既牛仔褲。
77. 我最憎人唔信我。
78. 如果你愛我,你唔會捨得要我傷心。
79. 我都鍾意行山,不過你可唔可以搵d易行d既路線俾我。
80. 一個男人對女人最大既尊重係向佢求婚,其次係帶佢返去同父母食飯。
81. 男朋友既功用係對女朋友好,女朋友既功用係對男朋友好。
82. 我用慣LUSH既soap,麻煩你每個月去買一塊俾我。
83. 好多事唔係我懶底扮唔識搵你做,而係我真係唔識。
84. 我希望你間唔中都會俾比d小驚喜我,係「小驚喜」,唔係「大驚喜」。
85. 你講過,而我又應承過既,我一定會做。例如:你唔o係我身邊我就要凌晨1點前返到屋企。
86. 唔好熄電話,萬一半夜我要去急症室我會想你陪我。
87. 我最鍾意既花係peony,最鍾意既顏色係紅色。
88. 我唔多鍾意收花,你送盆栽俾我好過。
89. 每次出街請你俾10分鐘我去行書店。
90. 如果你見我個樣冇乜表情,唔係我唔緊張你,而係愛一個人就會變得笨拙,我唔知用咩表情面對你好。
91. 如果有人追你,記得同我講,我會用掃把掃走佢。
92. 好遺憾我冇機會細細個就識得你,所以宜家請你俾多d時間我,俾機會我去了解你。
93. 我既工作或者比唔上你既重要,但我都希望你會尊重我既工作。
94. 你唔開心既時候我會靜靜行開俾時間空間你冷靜,但過後我會想你打返個電話俾我,因為我關心你。
95. 著得sexy係有兩個原因:1. 我覺得靚 2. 等你緊張我。
96. 我知你對我用咩化妝品護膚品冇興趣,不過問下咩顏色好都得掛。
97. 你要記得間中同我講「I love you」,否則我會以為你唔再愛我。
98. 我地要開一次會,睇下你對呢d戒條有冇異議。
99. 條文內如果有唔清楚既地方,以我既說話為依歸。
100. 其實,我明白這些戒條有點吹毛求疪有點不設實際有點妙想天開。我只想你知道,在寫這些戒條的時間內,每一秒鐘,也在牽掛你。


(看了帶銀公主寫的五十條,令我也蠢蠢欲動想為男友寫下一封有趣的情書。)

星期日, 7月 17, 2005

放下

友人不久前送了一篇陶傑的文章給我看:__________________________________________________

「當時是你任性,還是他不成熟?是因為一時的誤會,還是不明白一件關鍵的真相?經過這許多日子,一切已不再重要。即使當年的分手是錯的,今日看來,都已經變得很對,因為錯誤,在時間的洪流裡,可以慢慢淘洗為真理。」

「到了今天,他還在堅持當天的最後一句話:請你耐心聽我解釋。但是既然那時沒有聽他的解釋,今天更是沒有必要…… 因為心已經不一樣了。其中道理,何須表白,也無從細說,而如果他是一個聰明的男人,他應該比你更明白。」

你們都是這樣年輕,誰的一顆心,沒有摔痛過?

請放過她,讓她好好過。
__________________________________________________

我們有過開心的日子,

然而,

已經回不去的了。

請相信我,

我不是你命定的那人。

如果真要將愛情量化,

你的一顆心只是摔痛過一次,

而我的一顆心早已支離破碎,

正努力縫縫補補。

其實,

沒有誰的一顆心是用橡膠造成的,

我們都會痛會哭會心酸。

但我願意相信,

我們都會找到深愛自己的人。

每一次的心酸,

都是一場學習,

讓我們在日後更加懂得去愛。

請原諒我的自私,

我不想再擔驚受怕了。

唯有你願意放下,

我身邊的陰霾才能消散。

我不要再讓愛我的人擔心我的安全,

或是看到我眼內的憂戚。

甚至,

不想讓愛我的人知道這一刻我有多彷徨。

我不是一個涼薄的人,

也沒你想像中的貪慕虛榮,

只是一個平凡女人。

我看不明林行止聽不懂馬勒不理解政治,

只懂愛人被愛工作享受。

真正適合你的人,

從來不是我。

星期四, 7月 14, 2005

又煙又酒

放心好了,

那只是strawberry favour的水煙,

只是一次新鮮的體驗。

其實,

我並不熱衷於縱容自身。

那一盒薄荷味道的Cartier香煙,

是遺留在車上?

還是沒有從酒吧內帶走?

都忘了。

連同當時讓我傷心的人和事,

也都放下了。

由衷覺得一支煙是美好的享受,

還我們一刻的觸動。

不明白那麼多女孩子愛叫男友戒煙,

總是說為了他好。

我明白我明白。

然而,

在這樣的一個紛亂的墮落的無復清澈的世界,

不抽煙也不代表能活至仙壽恆昌。

對煙沒有心癮,

但有些時候,

也愛點起一支煙,

抽一口,

然後放在煙灰缸,

看著它燃燒淨盡。

過後,

重新開始。




給你所喜歡的人一支煙的空間,

也是愛。

星期四, 7月 07, 2005

六月

就這樣,

綿綿的六月過去了。

就這樣,

2005年一半的日子也過去了。

這一百多天的日子,

你做過些甚麼?

你牽掛過誰?

可有銘心的刻骨的事情發生過?

在玫瑰的故事內,

家敏跟咪咪說,

如果他們的女兒在六月出生,

便叫她做「六月」。

那些漂亮的六月新娘,

當雨水和著快樂的眼淚,

滑落在白紗上,

她們會否帶笑懊惱呢?

為著這美麗的六月,

請原諒我的胡言亂語。